Námskeið um örverufræði, 11. – 13. júní 2014

Námskeið um örverufræði, 11. – 13. júní 2014

Næsta sumarnámskeið Samlífs verður haldið dagana 11. – 13. júní og ber yfirskriftina Örverufræði. Námskeiðið er ætlað líffræðikennurum á hvaða skólastigi sem er.

Markmið námskeiðsins er að þátttakendur öðlist aukna þekkingu á örverum, eiginleikum þeirra og hlutverkum, kynnist helstu rannsóknum í örverufræði og sérstöðu þeirra hér á landi og geti miðlað þekkingu sinni áfram til nemenda á grunn- og framhaldsskólastigi.

Námskeiðið er samsett af fyrirlestrum og vettvangsferð. Örverur gegna veigamiklu hlutverki í lífheiminum. Þær eru mikilvægar í hringrás efna og mynda undirstöður flókinna vistkerfa. Undanfarin ár hafa erfðafræðilegar greiningar bætt miklu við þekkingu á breytileika örvera og hlutverkum þeirra í náttúrunni. Á námskeiðinu verða niðurstöður slíkra rannsókna kynntar auk þess sem öðrum viðfangsefnum örverufræðinnar verða gerð skil, einkum þeim sem hafa mikil áhrif á mannlegt samfélag. Þar má nefna sjúkdómsvaldandi örverur, faraldra og matvælaöryggi. Einnig verður fjallað um hagnýtingu örverufræðinnar og tengsl greinarinnar við atvinnulífið. Lögð verður áhersla á að kynna rannsóknir á örverum sem tengjast íslenskri náttúru, ekki síst hinum einstæðu íslensku jarðhitasvæðum. Námskeiðið verður haldið í húsakynnum Matís en þar starfa örverufræðingar að ýmsum verkefnum og munu þeir kynna viðfangsefni sín. Að auki verða ýmsir gestafyrirlesarar fengnir að námskeiðinu í samstarfi við Örverufræðifélag Íslands. Þátttakendur námskeiðsins munu því geta aukið miklu við þekkingu sína á örverum, eiginleikum þeirra og hlutverkum og miðlað henni áfram til nema á grunn- og framhaldsskólastigi.

Kennarar/fyrirlesarar:

Dr. Guðmundur Óli Hreggviðsson, líffræðingur, fagstjóri hjá Matís og prófessor í örverufræði hjá Háskóla Íslands.

Dr. Snædís Björnsdóttir, líffræðingur, verkefnisstjóri hjá Matís og aðrir gestafyrirlesarar.

Námskeiðsgjald (staðfestingargjald) er aðeins 5.000 kr en inni í því eru auk fyrirlestra og rútu í vettvangsferð, veitingar í kaffihléum og hádegisverður alla dagana.

Umsóknarfrestur vegna skráningar: 1. maí 2014.

Skráning fer fram hjá Samlíf. Fjöldi þátttakenda er takmarkaður við 25 manns vegna vettvangsferðar.

Miðvikudag og fimmtudag fer námskeiðið fram í húsnæði Matís, Vínlandsleið 12, 113 Reykjavík.

Dagskrá námskeiðs

Vettvangsferð með fyrirlestrum. Ferð um Suðurland þar sem skoðuð verða örverusamfélög, m.a. í heitum hverum. Einnig verða heimsótt fyrirtæki á svæðinu sem hagnýta örverur, einkum við matvælaframleiðslu.

Umsjónarmaður/tengiliður: Ester Ýr Jónsdóttir, esteryr (hjá) gmail.com